Carta de navegación

Sada, 1953

En aquel tempo era habitual ir ao mar con 10 anos, eran os que lles chamaban rapaces. Estas son a cartilla de navegación e cédula de inscripción marítima para o servizo militar, son de José Luis Vázquez Fernández, que empezou no mar con 9 anos e medio no ano 1953. Empezou enrolado no barco de José Manuel, que veu de Malpica, pero xa antes andivera no barco Lameiro.

Dende decembro ata marzo ou abril os barcos estaban parados e aproveitábase para arreglar as redes, pintar os barcos e outro traballo. Naquel tempo pescábase a ollo, non había radares. O traballo dos rapaces era limpar o barco e traballar na maniobra, tiña que agarrar o timón e maniobrar no remo da popa. Tamén tiñan que ir buscar un garrafón de auga para o barco e poñer a roupa dos mariñeiros a secar.

Normalmente, na tripulación ían entre 20 e 24 persoas, dous deles eran rapaces. Un deles ía no barco e outro na lancha para facer a maniobra. O que quedaba no barco tiña que limpar as táboas da lancha onde se poñía o peixe cun cacho de rede vella, ás veces limpábase coa pel do cazón, que é un tiburón pequeno coa pel áspera moi boa para rascar, tiñan que limpar as escamas que quedaban pegadas nas táboas. Cando os mariñeiros marchaban para a casa o rapaz quedaba aínda limpando a lancha.