As festas de agosto, a sardiñada, o baile na Terraza ou o globo era o tempo de esparcemento en Sada. Aquí recóllense todos eses momentos que deixaba o traballo para o lecer: merendas, troula, bailes e outras festas.
Sada D'Area, 1958
Cando se pon un retrato na Memoria de Sada, non só se lembran as persoas, o día que era, senón que tamén, en moitos deles, como neste, vemos como eran as nosas rúas e casas en aquel tempo. De cada cen, unha queda en pé. A única desta rúa de Sada D'Area que aínda se conserva é a de Maruja de Lopes, que está na esquerda da foto e non se ve. Segue a de Modesta, a de José Vázquez, a de Carmen, a de Fina Lareiras, a dos pais de Lexo, a de María da Garrida, a de Avelino, a de Nieves da Morena, a de Carmen e, ao fondo, o bar Inferniño, con Maruja á fronte, e a casa de Maruxa da Rula. Nese momento, no lado dereito só había hortas.
Os protagonistas da foto son Marcial Agra, un pai orgulloso que colle a Dominguito, mentres o tío Andrés sorrí e agarra a Cuqui, o can, para que non escape.
Hoxe están na nosa lembranza: a xente, as casas e as hortas. Todos menos o neno, que xa non o é tanto, e chámase Domingo.