Memoria de Sada no Culturgal 2013

Memoria de Sada no Culturgal 2013

Presentación de Memoria de Sada no Culturgal 2013

O sábado, 30 de novembro de 2013, Memoria de Sada estivo no Culturgal, a Feira das Industrias Culturais de Galicia, un dos eventos culturais máis importantes da nosa comunidade con máis de 14.000 visitantes (2013). Culturgal celébrouse por terceiro ano consecutivo en Pontevedra, un espazo no que a cultura galega amosa as súas novidades ou se presentan proxectos e iniciativas por parte de empresas, entidades, asociacións ou público en xeral. Entre presentacións de novidades literarias ou actividades dirixidas ao público infantil estivo Memoria de Sada, que da man de Maise, Pura, Lina, Maribel e Víctor (faltaron Maruja e Jesús, que non puideron ir) contaron todo o traballo que hai detrás da páxina, dende como xurdiu a idea nun curso da aula CeMIT ata chegar ás preto de 1.500 fotografías que tiña naquel momento.

A través dunha selección de fotos expuxemos como, a través de cursos, postas en común e pedindo fotos aos veciños e veciñas se fixo o traballo de crear este arquivo fotográfico que pertence a todos e todas as sadenses. Falamos tamén de como xurdiu a idea de organizar unha exposición (coa colaboración do Concello) e levar de internet á rúa as fotos para as persoas que non tiveron ocasión de velas. Nunca pensamos que a páxina chegara a ter tanta repercusión e foi para nós unha honra falar do noso proxecto. Seguiremos traballando para, entre todos, contar a historia de Sada.

Anuncio Memoria de Sada no Culturgal 2013

Memoria de Sada contacto@memoriadesada.com
As fotos pertencen aos veciños e veciñas de Sada.
Non se poden utilizar noutros proxectos (máis información).