
A través dos retratos coñecemos o noso pasado. As fotografías sempre foron para gardar un momento no recordo, e aquí recóllense esas fotografías un pouco máis persoais dos nosos/as devanceiros/as.
Horta da súa casa, 1922
Xa viúva, Andrea López veu da Coruña a vivir para Osedo e, despois dun tempo, a Sada. Aquí a todos os que viñan de fóra volvíanos bautizar, case sempre co nome do lugar de procedencia, no seu caso "A Coruñesa", o que tampouco era mentira. A súa casa estaba na rúa do Río, onde hoxe esta o Lóber. O seu fillo Manuel, que casou con Carmen Vázquez, tivo oito fillos: Lola, Manolo, Isidro, Pepe, Carmiña, Paco, Josefina e Avelina, todos eles moi traballadores e moi boa xente. De todos, xa só quedan entre nós, a neta que está no colo de Andrea, a cal todos coñecemos como Lola da Coruñesa (a maior de todas) e tamén Avelina, a máis nova delas, hoxe en Venezuela.