Eliseo Pita Collazo, un emprendedor

Dársena da Coruña, 1969

Naceu en Santa Cruz (Oleiros) e, sendo moi novo, emigrou a Estados Unidos. Despois duns anos, volveu á súa terra e casou con Consuelo García González. Tiveron dous fillos, Eliseo e Chelito, e tamén catro netos.

Eliseo mercou o seu primeiro autocar no ano 1929, para cubrir a ruta de Oleiros a Coruña. Cando viñeron vivir a Sada, no ano 1938, comezaron a facer a ruta Fontán-Coruña, que máis tarde foi ampliada ata o centro de Sada. Como hai un dito que di "un non é de onde nace, senón de onde pace", Eliseo e Consuelo xa quedaron aquí, como dous sadenses máis. Como era moi negociante, tamén tiña dúas lanchas, "Júpiter" e "La Chelito", que facían o traxecto Mera-Santa Cruz-A Coruña por mar. É dicir, só lle faltou ir polo aire!

No retrato de embaixo estan él e o seu irmán, Manolo Pita, con seu primeiro coche. Gustoulle moito cando o mercou, pero era tan grande que non se deu conta de que as carreteras de aquí non eran as de New York! Despois comprou o outro, na imaxe de arriba, e velaí os están na Dársena da Coruña, bautizando o segundo.

En fin, Eliseo foi un home bo, traballador e listo coma un allo, feito a si mesmo. Así mo conta a súa neta Belén, que sempre fala chea de cariño e admiración polos seus avós.