Xente

A través dos retratos coñecemos o noso pasado. As fotografías sempre foron para gardar un momento no recordo, e aquí recóllense esas fotografías un pouco máis persoais dos nosos/as devanceiros/as.

envíanos información da foto

José Monzo Ríos

Sada, década de 1920

Naceu en Sada no ano 1906, no seo dunha ampla familia mariñeira. O seu pai era Manuel Monzo Babío, armador, e a súa nai era María Ríos Andrade.

Emigrou nos anos 20 aos EEUU, onde entrou en contacto co movemento anarquista. Unha vez retornado a Sada, fundou e presidiu o Centro Cultural Obrero, o Sindicato de Oficios Varios de Sada (CNT) e os grupos Luz e Nueva Vida, integrados na Federación Anarquista Ibérica, constituíndose nun dos sindicalistas de máis peso da comarca.

Destacou coma orador en numerosos mitins e representou ao Sindicato en plenos da Confederación Regional Galaica (Santiago, 1933) e da CNT (Zaragoza, 1936).

Contraeu matrimonio civil no ano 1931 con Josefa Abad Golán, con quen tería dous fillos: Vida e José.

Organizador en Sada da resistencia a sublevación militar de xullo de 1936, coa chegada dos sublevados agocharase en varias casas da vila, fuxindo posteriormente a Miño e permanecendo algún tempo nos illotes Carbón e Carboeira. A comezos de xullo do 1938, enfermo e sen máis alternativa, decidirá poñer fin a súa vida. O seu cadáver será atopado o día 17 nunha serreira abandonada da estrada de Sada a Fontán.

Máis imaxes

contacto@memoriadesada.com
As fotos pertencen aos veciños e veciñas de Sada.
Non se poden utilizar noutros proxectos (máis información).