Na Ribeira

Ribeira de Sada, 1953

Estas mulleres, traballadoras natas, dábanlle a todo. Ían á rampla a comprar, despois vendían o peixe na praza de San Roque ou levábano a vender a Betanzos a pé, coas cestas e patelas na cabeza, unhas enriba das outras, cargadas de peixe. Cando acababan de vender, xuntábanse na Ribeira a fregar os topes e, se algún día sobraba sardiña, apostaban e salábana alí mesmo. Se era xurelo grande, escanchábano e secábase despois para vendelo ao outro día: non se perdía nada. Máis tarde, ían para sua casa a gobernar a súa vida para, ao día seguinte, volver a empezar. Hoxe en día chamaríanas todo-terreo ou emprendedoras, pero o certo é que eran supermulleres.

Con este retrato quero homenaxear a todas as mulleres traballadoras do mar e para o mar, de antes, de agora e as que virán. Piares deses portos e lonxas, man a man cos mariñeiros, nun traballo que nunca foi doado nin convenientemente recoñecido. Coa Terraza de fondo, un referente das súas vidas e do pobo no que naceron, elas eran: de costas,Toñita Lopez, Modesta Pena, Esperanza Sanduende, Gelita López, Maruja Vales, Mariflor Gómez e Esperancita, a nena de Esperanza. O home que asoma po la ponte do Rio Mallor é Manuel Souto.