Cerimonias

Fotografías de vodas, procesións, desfiles, enterros, o ramo e outros eventos son mostras da importancia que tivo a relixión na vida do noso pobo.

envíanos información da foto

San Xosé, patrón de Samoedo

Igrexa de Santa María, en Sada D'Arriba, 1957

Case a finais de setembro era a romaría de San Xosé, patrón de Samoedo. Hai anos, íase escoitar a misa a Sada D'Arriba e, cando remataba, saíase co santo en procesión arredor da igrexa. Botaban moitos fogos artificiais e, logo, todo o mundo, xunto cos invitados, ía ao campo da festa para a sesión vermú. Despois marchaba á casa para o xantar e, pola noite, outra vez festa!

A Orquestra X era a que máis viña nos primeiros anos. Tocaba unha peza que todo o mundo cantaba ao comezo do baile. Coa melodía de "Ondiñas veñen", a letra dicía: "Orquestra X, Orquestra X, veu da Coruña a Samoedo a tocar...". Como todo muda, os de Samoedo tamén acabaron por facer misa de campaña cantada polo coro de Lubre no propio campo da festa e San Xosé xa viña e volvía para a Igrexa en furgoneta! Iso si, o que sempre o acompañou foi a auga: caían verdadeiros diluvios! Pero os de Samoedo miraban para outro lado e seguían a troula ata a madrugada. Moita daquela xente segue na nosa memoria, todos eran inmellorables. Entre eles, Juan do Recho, que era inconbustible coa súa alegría. Quen o coñeceu sabe que non minto.

Na imaxe, levando o santo van: detrás, Paco de Capelo, e diante, Pepe de Pontellos e Enrrique de Clara. Á esquerda, Felisa do Pegho e, á dereita, Maruja Mosquera e a súa curmá, Pepa de Valado.

Máis imaxes

contacto@memoriadesada.com
As fotos pertencen aos veciños e veciñas de Sada.
Non se poden utilizar noutros proxectos (máis información).