Festas e lecer

As festas de agosto, a sardiñada, o baile na Terraza ou o globo era o tempo de esparcemento en Sada. Aquí recóllense todos eses momentos que deixaba o traballo para o lecer: merendas, troula, bailes e outras festas.

Traballo e festa

Traballo e festa

Samoedo, Sada, 1954

Era pola mañá cedo. Xa Enrique de Bardavin viña da leira. Era festa na parroquia e encontrouse con toda esta troula que ía acompañando o grupo de gaitas Os da Xesta, de Carballo, para dar a alborada. El tamén debeu de pensar: "Rematou o traballo!". Con todo, tiveron tempo para posar así de ben para a foto.

A xente de Samoedo sempre foi moi amiga da troula. As súas festas sempre foron sonadas, mesmo sen moitos medios. Despois duns anos sen elas, tempo despois volveron facelas con máis éxito. Coido que o secreto de toda festa está na xente que a fai e no humor e alegría que teñan os veciños e invitados. Podo dicir que os de Samoedo ían sobrados das dúas cousas. Mágoa que este ano non haberá festa: moita daquela xente xa non está, outra vai maior e os novos non estan polo labor. Organizar unha festa é moito sacrificio para uns poucos e nunca faltan as críticas despois. Agardaremos a que medren os novos!

Comezando por arriba, de esquerda a dereita, elas e eles son: Aurorita, Marité, Juan da Recha, Ricardo da Maja, Luis de Castro, Pila, Juana e Manola do Maceirento, Juanito de Capelo, Manolito da Maja, Casimiro de Mallou, Toñito Portela, Manolito Vales, Tonucho de Pontellos, Paco de Capelo (el doume toda a información) e Avelino do Cochero. Coido que a vaca chamaríase Roxa ou Marela, como case todas.

envíanos información da foto

Máis imaxes

contacto@memoriadesada.com
As fotos pertencen aos veciños e veciñas de Sada.
Non se poden utilizar noutros proxectos (máis información).