Memoria de Sada: nós e o proxecto

Memoria de Sada é un arquivo fotográfico da historia de Sada. Naceu a comezos de 2012 nun curso na aula CeMIT. Detrás da páxina están Maruja Babío, Pura Pardo, Jesús Francos, Lina Andrade, Maribel Brandariz e Maise Vázquez que son os que escriben os textos e recompilan as fotografías, Víctor González, que se encarga do apartado técnico e axuda coas fotos e textos e Jose Miguel Gayoso, que axuda escaneando as fotos. As fotos pertencen aos veciños e veciñas de Sada, non se poden utilizar para outros proxectos.

Detrás de Memoria de Sada

Víctor, Lina, Maruja, Jesús, Maribel, Maise e Pura

Comezamos a recompilar fotografías antigas noutras actividades anteriores a Memoria de Sada, decatándonos do interese histórico para contar como era a vida en Sada ao longo do último século. Decatámonos tamén do interese que espertaba entre a xente as fotos antigas e decidimos crear esta páxina que estás vendo. Aquí queremos recoller a evolución da vila a través de fotos.

Comezamos así a recoller fotos, ao comezo escaneando de libros, despois pedindo aquí e acolá, convencendo pouco a pouco a todos/as para que nos cederan as fotos. Organizámonos e a través de cursos e postas en común o proxecto foi evolucionando ata o que temos hoxe en día. Tan importantes como as fotos son os textos que as acompañan, escritos e/ou recompilados integramente polos mencionados máis arriba. A meirande parte das fotos foron aportadas por veciños e veciñas de Sada, aos que lles queremos agradecer enormemente o esforzo de buscalas e cedérnolas para ser expostas aquí, sen elas non sería posible.

O contido da páxina está en galego e castelán. A idea inicial foi que estivera integramente en galego, pero algunhas das persoas que escribiron os textos das fotos sentíanse máis cómodas escribindo en castelán polo que decidimos deixalo nos dous idiomas, sabendo que non é o máis axeitado, pero asumíndoo como un tema secundario pola imposibilidade técnica e de tempo de telo nos dous idiomas.

Agardamos que esta páxina sexa punto de encontro para todos os que estamos interesados na historia do noso pobo, pois cremos firmemente que coñecer algo é o primeiro paso para amalo.

contacto@memoriadesada.com
As fotos pertencen aos veciños e veciñas de Sada.
Non se poden utilizar noutros proxectos (máis información).