Fonte provisional na praza da Pescadería

Praza da Pescadería, 1956

Cando quixieron facer de novo a fonte que había no medio da praza da Pescadería, que segundo dicían tiña a auga do mesmo manantial que a da Barrosa, pasáronna para a muralla de Pancha Morlán, oonde puxeron un gran grifo. As mulleres con sellas, caldeiros e tinas facían cola para agardar a súa vez. Digo mulleres, mozas e nenas, porque homes nunca se vía ningún nesas tarefas. Eles usábana, pero aquel traballo era delas: carretar topes e topes de auga para todo o que facía falta na casa. Tamén era unha forma de vida para moitas, que facían de augadoras para as casas que lles pagaban. Para poñer a sella na cabeza facíase un molido cun pano, en forma redonda e usábase de soporte para, así, manter o rixo. Despois levaban un caldeiro cheo en cada man e xa se tiña o equilibrio completo. Supoño que non esqueceríades todas que é un molido...

As rapazas da imaxe, comezando pola esquerda, son Gloritina, Secundina, América, Eduarda, Lolina (de trenzas), Maruja, Manolita, María Jesús e Milagros, irmá de Manola e Benilde. Cos anos, a fonte pasou para o centro da praza da Pescadería e foi reformada dúas veces. Aí está un dos poucos recunchos auténticos que nos quedan.